5.2.23

Amerikanın əmək bazarına dair fundamental göstəricilərin müsbət açıqlanmasından sonra valyuta birjalarında dollar sürətli bahalaşma dalğasına daxil oldu. Bu həftə isə investorları maraqlandıran növbəti sual trendin davamı və buna təsir edə biləcək amillərdir. 

Fevralın 6-da başlayacaq yeni həftədə Amerika, Avropa, Almaniya, Yaponiya, İngiltərə, Avstraliya və Yeni Zelandiyadan açıqlanacaq vacib fundamental göstəricilər ilə yanaşı, Çindən yayımlanacaq inflyasiya göstəriciləri də investorların diqqət mərkəzindədir.  

Çində iqtisadi aktivliyə dair siqnallar

Cümə günü Bakı vaxtı ilə saat 5:30-da Çindən istehlak və istehsal qiymətləri indeksi açıqlanacaq. İqtisadçılar dünyanın ikinci ən böyük ölkəsində inflyasiyanın yanvar ayında 1.8 %-dən 2.2 %-ə yüksələcəyini ehtimal edirlər. Görünən odur ki, Çində son pandemiya məhdudiyyətlərinin yumşaldılması özünü iqtisadi aktivliyinin güclənməsində göstərməkdədir. Qlobal bahalaşma dalğası fonunda Çinin kommersiya fəaliyyətləri öz qiymətlərini də artırır. İstehlakın güclənməsi ilə bahalaşma baş verir. Oktyabr ayından Çində inflyasiya 2.8 %-dən enməyə başladı və noyabrda 1.6 %-ə çatmışdı. 

Bunun valyuta birjalarına təsiri baxımından önəmi ona görə yüksəkdir ki, qlobal iqtisadiyyatda canlanma yenidən güclənə və FED faiz artımında cəsarətlənə, dollar da bahalaşa bilər. 

Amerika və Çin iqtisadiyyatı ilə bağlı nikbinlik elektro avtomobillər bazarının perspektivləri ilə də əlaqəlidir. Gələcəyin nəqliyyat sektorunda Çin liderliyi qorumaqdadır. Amerikanın mövqeyi ikinci olsa da çox geri qalmır. Sonrakı yerləri sıra ilə Almaniya, Cənubi Koreya, Yaponiya, Fransa və İtaliya tutur. Bu, sadalanan ölkələrin iqtisadiyyatlarında sahəyə olan marağı, investisiyanın intensivliyini və inkişaf istiqamətlərini göstərir. 

ABŞ-ın demokrat höküməti də iqlimin mühafizəsi fonunda investisiyaları genişləndirməyi prioritet siyasət hesab edir. Bunun üçün ənənəvi yanacaq bazarında tələb aşağı enməlidir. Bu baş verdikcə, dövlətin investisiyaları artacaq və iqtisadiyyatda inkişaf trendi güclənəcəkdir. 

BP-nin maliyyə hesabatı

Bununla bağlı gələn həftənin çərşənbə axşamı BP tərəfindən açıqlanacaq maliyyə hesabatı da önəmli rol oynayacaqdır. Təbii neft sektorunda 1909-ci ildə yaradılan "British Petroleum" 55 milyard dollar ilə dünyada 7-ci ən böyük kompaniyadır. Burada işlərin zəifləməsi və ya yaxşılaşması neftə olan tələbin müvafiq olaraq ya aşağı düşməsi, ya da artmasından xəbər verir. Neft qiymətini proqnozlaşdırmağa da imkan yaranır

Beləliklə, qlobal iqtisadiyyat və neftin ucuzlaşması ilə bağlı müsbət siqnallar gələn həftə investorların diqqqət mərkəzində olacaq ən önəmli hadisələrdir. 

İlkin Alıyev