ABŞ-da istehlak qiymətlərinin illik artım dinamikası iyun ayında 3 %-ə enib. Bu, sürpriz oldu, çünki analitiklər 4 %-dən yalnız 3.1 %-ə enəcəyini proqnozlaşdırırdılar. Dollarda sürətli dalğalanma da bununla əlaqəli idi. Lakin bu, Amerika Federal Ehtiyat Sisteminin (FED) iyulun 26-da faiz dəhlizinin yuxarı sərhədini 5.5 %-ə yüksəldəcəyi ehtimallarının azalmasına nəinki səbəb oldu, 89.3 %-dən 95.5 %-ə yüksəlməsi müşahidə edilir. İnflyasiyanın enməsi göstəricilərinin dərcindən sonra dolların aşağı istiqamətlənməsinə səbəb isə bunun real sektorda "bayrama" səbəb olması ilə əlaqələndirilməlidir. Qiymətlərin ucuzlaşması ticarəti və iqtisadiyyatı canlandırır. 

ABŞ-ın real sektorunda risklər inflyasiyanın enməsi xəbəri ilə daha da azalaraq, güvənli liman maliyyə aləti olan dollarda, "son sığınanlar"ın da səhm bazarına qayıtmalarını cəsarətləndirdi. Beləliklə, dollara tələb azalmaqla - dollar indeksinin 1.93 % düşməsi ilə yanaşı, amerikan səhm bazarının da ciddi dəstək gördüyü müşahidə edilir. Digər tərəfdən, son illər yüksək inflyasiyaya səbəb olan amillərlə - risklərlə bir daha tanış olduqda və amerikan səhm bazarına xaricdən də axın olacağını nəzərə alsaq, dolların yenidən güclü dəstək görə biləcəyini proqnozlaşdırmaq mümkündür. Yəni U dönüşü başlaya bilər. 

Dünyanın siyasi mənzərəsi gərgin olaraq qalır və daha da dərinləşə biləcəyi riskləri mövcuddur. Bu, ticarət kanallarının hələ təhlükə altında olmasını deməyə əsas verir və çətin gedən iqtisadiyyatlar həmişə yüksək qiymətlərə əsas verib. Ölkə daxilində də qarşıda seçkilərin olduğunu nəzərə aldıqda, siyasi risklərin yüksək olduğunu nəzərə almaq lazımdır. Bu səbəbdəndir ki, FED-in sədri Jerom Povel hər mətbuat konfransında sərt monetar siyasətin uzun müddət davam etdiriləcəyini vurğulayır. Nəticədə dollar həm daxili, həm də xaricdən yenidən tələb görə bilər.